Сүүлийн үед МАХН-ын дарга Н.Энхбаярыг сонгуульд нэр дэвшүүлэх, дэвшүүлэхгүй талаар мэдээлэл гарч маргаан үүсгээд байна.
СЕХ-ноос 2016 оны УИХ-ын сонгуульд нэр дэвшигчдийн материалын хянаж шаардлага хангахгүй байгаа нэр дэвшигчдийг бүртгэхээс татгалзсан юм. Эдгээр нэрсийн дунд МАХН-ын дарга Н.Энхбаяр болон тус намын хэд хэдэн нэр дэвшигч багтсан байсан. Тодруулбал, АН-аас 2, МАХН-аас 5, Тусгаар тогтнол эв нэгдэлийн намаас 1, нийтдээ 9 хүнийг бүртгэхээс татгалзаад байгаа юм. Н.Энхбаярын хувьд ялтайд тооцох хугацаа дуусаагүй учраас сонгуульд нэр дэвших боломжгүй болоод байгаа юм. Өмнө нь Н.Энхбаяр дарга “Шударга ёс” эвслийн бүлэг задраагүй байхад Ч.Сайханбилэгийн танхимд Шадар сайдаар зүтгэсэн ч мөн л ялтайд тооцох хугацаа дуусгавар болоогүй хэмээн бүдэрсэн. МАХН-ын Н.Энхбаяр тэргүүтэй, гишүүд дэмжигчид үүнийг эсэргүүцэж, нойтон өлсгөлөн зарлаж, хэсэг суулт зарласан.
Намын удирплагуудын өлсгөлөн зарласаны хажуугаар намын зарим гишүүд намынхаа гишүүнчлэлээсээ албан ёсоор татгалзаж байгаагаа мэдэгдсэн юм. Тэд Н.Энхбаярын энэ өлсгөлөнгөөс шалтгаалж, нэр дэвшигчид нь тойрогтоо штабаа байгуулах, орон нутагт бэлтгэлээ базаах ажлууд нь хоцорч байгаа учраас уг шийдвэрийг гаргасан гэдгээ тайлбарласан. Түүнчлэн намын нөхөд нь түүнийг өлсгөлөн зарлах нэрийдлээр далд сурталчилгаа явуулсан гэж үзэж буйгаа ч илэрхийлсэн. Харин МАХН-ын Дарга Н.Энхбаяр "Цагдаагийн газраас хууль бус үйл ажиллагаа явуулсан. Цагдаагийн байгууллага өнөөдөр Монгол Улсын Ерөнхийлөгч Ц.Элбэгдорж, Ерөнхий сайд Ч.Сайханбилэг нарын гарт орсон. Сонгуулийн Ерөнхий Хороо МАНАН-гийн гар хөл болсон байна. ЦЕГ-ын дарга Р.Чингисийн гаргасан хууль бус бичгийг үндэслэн нэр дэвшигчийг бүртгэхээс татгалзсан шийдвэр гаргажээ. Хэрэв Н.Энхбаяр сонгуульд оролцохгүй бол зөвхөн МАНАН-д ашигтай, луйврын сонгууль болох нь батлагдаж байна" гэсэн мэдээлэлийг өчигдөр хэлсэн.
Харин түүний ялтайд тооцох хугацааны талаар УИХ-ын дарга З. Энхболд санал бодлоо илэрхийлсэн нь олон хардлагыг төрүүлээд байна. Конгрессын төлөөлөгчдийн танхимын гишүүн Жим Макдормет УИХ-ын дарга З.Энхболдод хандан "Монгол Улсын Ерөнхийлөгч асан Н.Энхбаяр авлигалын хэргээр шүүгдээд, дараа нь өршөөлд хамрагдсан. Тэрээр УИХ-ын сонгуульд нэр дэвших хүсэлтэй байгаа, үүний тулд намынхаа 17 гишүүний хамтаар өлсгөлөн зарлаад байгаа юм байна. Хөндлөнгөөс харахад ойлгоход бэрх энэ үйл явцын талаар та тайлбарлаж өгнө үү” хэмээн асуухад УИХ-ын дарга хариулахдаа, энэ бол одоо мөрдөгдөж буй Эрүүгийн хуультай холбоотой. Ирэх есдүгээр сарын 1-нээс бид шинэ Эрүүгийн хуулийг дагаж мөрдөх юм. Одоогийн Эрүүгийн хуульд хуучин нийгмийн тогтолцооноос үлдсэн зүйл гэвэл хүн ял эдлээд дуусахад, үүний дараа "ялтай тооцох хугацаа” гэдэг тодорхой хугацаа байдаг. МАХН-ын дарга Н.Энхбаяр, нам нь манай намтай хамтарч Засгийн газар байгуулсан. Н.Энхбаярын хувьд "Намайг уучилсан. Мөн Өршөөлийн хууль батлагдсан учраас миний ялтай тооцох хугацаа дууссан” гэдэг байр суурьтай байгаа. Харин Цагдаагийн байгууллагын зүгээс "Таны ялтай тооцох хугацаа дуусаагүй” гэсэн. Ийм л маргаан байгаа. Дараагийн сонгуулиар ийм маргаан гарахгүй, учир нь шинээр дагаж мөрдөх Эрүүгийн хуульд "ялтай тооцох хугацаа” гэдэг ойлголтыг байхгүй болгосон. Энэ удаагийн парламентын хийсэн хамгийн том реформ бол 1990 оноос өмнө байсан Эрүүгийн хууль болон хуулийн салбартай холбоотой реформыг бүрэн хийж дуусгасан. "Ялтай тооцох хугацаа” гэдэг ойлголт Сонгуулийн тухай хуульд орсон нь зөв эсэх талаар би хувьдаа бодоод л байгаа. УИХ-ын гишүүнийг ард түмэн сонгодог болохоос Цагдаагийн даргын бичгээр сонгох, сонгогдох эрхийг хязгаарлах нь буруу гэж бодож байна” гэсэн хариулт хэлсэн. Үүнээс харахад хэрвээ ялтайд тооцох хугацаа нь дуусаагүй байсан ч гэсэн ард түмний сонгох сонгогдох эрхийг цагдаагийн даргын бичгээр хязгаарлах буруу бөгөөд нэр дэвшүүлэх хэрэгтэй хэмээн хэллээ.
Хэрвээ МАХН-ын дарга Н.Энхбаяр нэр дэвшвэл АН-д ашигтай хувилбар гарч ирнэ. АН одоогийн рейтингээрээ сонгуульд өрсөлдвөл МАН-д ялагдах магадлал өндөртэй. АН төр барьж байх үед Засаг олон удаа огцорч, төрийн тогтворгүй байдал бий болдог. Үүнийг биеэрээ үзэж туулж байгаа иргэд энэ сонгуулиар МАН-д итгэл хүлээлгэх магадлалтай. Үүнийг мэдэж байгаа АН-ын дарга З. Энхболд Н.Энхбаяр болон түүний нөхдийг нэр дэвшүүлж МАН-ын саналыг хуваах зорилготой байгаа нь мэдээж. МАХН-аас нэр дэвшиж байгаа хүмүүс олон танигдсан улс төрчдийг эс тооцвол, улс төрд болон төрийн албанд танигдаагүй, шинэ цэргүүд гэж хэлж болно. Гэхдээ наадмаар бол “битүү морьд” гэнэт цойлдог шиг Н.Энхбаяр даргынхаа нэрэн дор МАХН-ын нэр дэвшигчид хүчтэй байх нь тодорхой. Энэ л хувилбараар сонгуулиар ажиллахаар Зи дарга төлөвлөсөн нь мэдээж. Н.Энхбаярт хайртай бас харшилтай хүмүүс олон. Харшилтай хүмүүс тэргүүн эгнээнд МУ-ын Ерөнхийлөгч Ц.Элбэгдорж орно. Ерөнхийлөгчийн хувьд Н.Энхбаярыг улс төрд оруулахгүй гэсэн байр сууриндаа хатуу зогсож байгаа. Энэ хоёр эрхэм хоёулаа төрийн тэргүүнээр ажиллаж байсан, ажиллаж байгаа ч гэсэн өнөөдрийг хүртэл бие биенээ хүлээн зөвшөөрөлгүй хонь чоно мэт харьцаж ирсэн. Гэхдээ энэ сонгуулиар МАХН болон Н.Энхбаярт найр тавихгүй бол АН ялах магадлалтай харагдаж байна. Энэ сарын 07-ны өдөр Н.Энхбаяр даргын нэр дэвших үгүй нь тодорхой болж, сонгуулийн дүр зураг тодорч эхэлнэ. Н.Энхбаяр болон түүний нөхөд сөрөг хүчнүүдэд хүчтэй өрсөлдөгчдийн нэг байх болно.
