УИХ-ын гишүүн О.Баасанхүү өлсгөлөн зарлахаа мэдэгдлээ. Тэрбээр бид бусад улс орны иргэдийн адил Улс орондоо батлагдсан хуулиудад заасны дагуу эдлэх ёстой эрх, хүлээх ёстой үүргийг хүлээж тэгш эрхтэйгээр сонгох, сонгогдох эрхээ эдэлж, итгэл үнэмшлээ чөлөөтэй илэрхийлэх хүсэлтэй байдаг. Гэтэл МАХН гэх намыг сонгон, итгэл үнэмшлээрээ энэ намын гишүүн болсныхоо төлөө МАХН-ын дарга болон эгэл жирийн гишүүдийг хавчин гадуурхаж, мөрдөн мөшгиж, айлган сүрдүүлж сонгуульд тэгш оролцох бололцоо боломжийг олгохгүйн төлөө бүхэл бүтэн төрийн систем бүхлээрээ ажиллаж байгаагийн улмаас зөрчигдсөн эрхээ хамгаалах үүднээс тэмцлийн хурц хэлбэр болох өлсгөлөн зарлах хэлбэрийг бид сонгож байгаагаа үүгээр илэрхийлж байна хэмээн өлсгөлөн зарлах шатгаанаа онцолжээ. Мөн манай оронд сүүлийн долоон жилд сонгуулийн болон хүний эрхийн үндсэн зарчим үндсэндээ алдагдаж, нэг хүний дарангуйлсан шийдвэрт түшиглэсэн, хэсэг бүлэг олигархуудад үйлчилсэн хууль хүчний байгууллагын бүхэл бүтэн систем бий болж энэ нь эргээд Монгол Улсын сонгож авсан ардчилсан тогтолцоонд томоохон ухралт үүссэн болохыг дуулгаж байгаадаа гүнээ харамсаж байна. Энэхүү тэмцлийн хурц хэлбэрийг сонгох болсон нь дараах шалтгаантай шууд холбоотой болно. Үүнд:
1. МАХН-ын дарга Монгол Улсын 3 дахь Ерөнхийлөгч Н.Энхбаярыг 2012 оны сонгуульд хүчээр, хууль бус шалтгаанаар оруулаагүй, 2016 оны сонгуульд ч мөн адил хууль бус шалтаг шалтгаан тоочин дахин сонгуульд оруулахгүй, сонгох, сонгогдох эрхийг нь зөрчиж байгаа,
2. МАХН-аас нэр дэвшсэн нэр дэвшигчдийн нэр хүндэд халдах, хууль хүчний байгууллагаар айлган сүрдүүлж дарамтлах, мөрдөн мөшгих, зохион байгуулалттайгаар хэвлэл мэдээллээр нэр төрийг нь гутаах үйлдлүүдийг удаа дарааллан хийж байгаа,
3. МАХН-ын намын байр, нэр дэвшигчдийг тагнаж, чагнах, мөрдөн мөшгих, намд сайн дураар хандив өгөх хүсэлт бүхий иргэн, аж ахуй нэгж байгууллагуудыг урьдчилан олж тогтоож, тухайн этгээдүүдэд дарамт шахалт үзүүлж байгаа,
4. Нэр дэвшигчдийг хуулийн дагуу зарлан сонгуулийн бэлтгэл ажлаа эхлэх үед нь шүүх рүү зохиомол гомдлуудыг хүргүүлж, зохион байгуулалттайгаар сонгуульд нэр дэвшигчээс нэрийг нь татуулахаар бэлтгэж байгаа зэрэг хууль бус үйлдлүүдийг эрс эсэргүүцэж, энэхүү тэмцлийн хурц хэлбэрийг сонгож байгаа билээ.
