УИХ-ын гишүүн Д.Тэрбишдавга "Би бүлгээсээ гарна" гэжээ

УИХ-ын нэгдсэн чуулганаар өнөөдөр Цэцийн дүгнэлтийг хэлэлцэх хуваарьтай байсан юм. Тодруулбал, ҮХЦ-ээс сонгуулийн тухай хуульд багтсан намын жагсаалтаар сонгогддог хэсгийг Үндсэн Хууль зөрчсөн хэмээн шийдвэрлэсэн. Одоогийн байдлаар АН болон МАН-ын бүлэг Цэцийн дүгнэлтийг хүлээж авах нь зүйтэй гэж шийдсэн. Мөн Төрийн байгуулалтын байнгын хороо, Хууль зүйн байнгын хороо өчигдөр уг асуудлыг хэлэлцээд УИХ-аар хэлэлцэхийг дэмжсэн. Харин дээрх асуудлыг МАХН-МҮАН-ын "Шударга ёс" эвслийн бүлэг хүлээж авахаас татгалзжээ. Тэгвэл өнөөдөр чуулганаар хамгийн түрүүнд уг асуудлыг хэлэлцэх ёстой байсан эвслийн бүлгээс завсарлага авсан. Харин бүлэг нь завсарлага авахыг дэмжихгүй байсан ганц гишүүн бол Д.Тэрбишдагва гишүүн байлаа. Тэрбээр "Ард түмний 90 гаруй хувь нь хүсээд сонгуулийн хуулийн өөрчлөлт хийгээд байхад бүлэг ийм балай юм хийж болохгүй. Би өчигдрийн бүлгийн хуралдаанд оролцоогүй. Надаар үг хэлүүлэхгүй байна. Би үг хэлсэн бол энэ завсарлага авах асуудлыг ч гэсэн болиулмаар байна" гэв. Тэгвэл хамгийн сонирхолтой нь тэрбээр микрофонгүйгээр "Би бүлгээсээ гарна" гэж орилсон талаар эх сурвалжууд мэдээлж байна. Мөн дашрамд дурдахад, УИХ-ын гишүүн Д.Тэрбишдавга намуудын дарга, генсекүүдэд хандаж жагсаалтыг байхгүй болохыг дэмжихийг хүссэн уриалга гаргаад байна.