УИХ-ын гишүүн Г.Уянга Тусгаар тогтнол, эв нэгдлийн намыг найм хоногийн өмнөөс удирдах болсон билээ. Одоогоос жилийн өмнө байгуулагдсан тус намын нууц ноёнтноор Женко Х. Баттулга байгаа гэх мэдээлэл олон нийтийн дунд тархаад байсан. Үнэхээр ч тус намын асуудал Х. Баттулга зэрэг хуучин намдаа багтаж шингэхээ больсон "томчуудын" зохион байгуулсан төсөл болох нь тодорхой байгаа юм. Хамгийн сүүлийн үеийн баттай эх сурвалжийн мэдээгээр УИХ-ын гишүүн Г.Уянгыг "Тусгаар тогтнол, эв нэгдлийн” нам болон ХҮНамын эвслийг удирдан сонгуульд орохоор болсон байна.
Хэдийгээр дотоод зөрчилтэй байгаа ч улстөрийн шинэ хүчин болсон ХҮНам нь сүүлийн үеийн судалгаануудаар жижиг намуудын хувьд хамгийн өндөр рейтинг бүхий үзүүлэлттэй гарч байгааг эх сурвалжууд нотолдог. Өөрөөр хэлбэл судалгаагаар дөрөвдүгээрт буюу МАН, АН, МАХН-ын араас шил даран эрмэбэлэгдэж яваа юм. Улмаар Х.Баттулга ХҮНамын даргаар С.Боргилыг болгож, тус намын санхүүжилтийг хариуцах болно хэмээн намдаа хуваагдаад байгаа С.Боргил, Т.Доржханд, Б.Найдалаа нартай уулзаж тохиролцоонд хүрчээ. С.Ганбаатарыг ХҮНамын даргаар хоёр ч удаа дээд шүүх дээр бүртгүүлж чадахгүй байснаас харахад энэ үйл явдал, төлөвлөгөө нь аль эртнээс хэрэгжиж байсныг бэлхнээ харуулж буй юм. Улсын дээд шүүх түүний албан ёсны шийдвэрийг хэн нэгний ямар ч баримт бүрдэлгүй өргөдөлтэй тэнцүүлэн үзэж, "нэг намаас хоёр хүсэлтийг хангах боломжгүй" гэж тайлбарласан билээ. Аль нэг том намын даргыг бүртгэхэд хэн нэгэн давхар өргөдөл өгч гацааж болдог буруу жишгийг бий болж байгаа юм болов уу? Нөгөөтэйгүүр Дээд шүүхэд Женко Х.Баттулгыг маш их нөлөөтэй гэдгийг хэн хүнгүй мэдэх биз. Хэдийгээр аль, аль нь ижилхэн гудамжны тэмцэгч, популист нэрийг зүүдэг ч гэлээ С.Ганбаатарын нэг номерын рейтинг түүний хэн нэгний "үгэнд ордоггүй", мөн Г.Уянгын түүн рүү хаягласан хэд хэдэн удаагийн шүүмжлэлүүд энэ бүхний нотолгоо болж өгнө.
