Дорнод аймгийн Халхгол суманд гарсан түймрийн улмаас таван тээврийн хэрэгсэл мөргөлдсөн ноцтой осол гарчээ.
Тодруулбал, цагдаагийн байгууллагад дөрөвдүгээр сарын 10-ны өдрийн 13:50 цагт Дорнод аймгийн Халхгол сум, хоёрдугаар баг, Газрын тосны 21 дүгээр талбайн урд зам тээврийн осол гарч, автомашинууд мөргөлдсөн” гэх дуудлага, мэдээлэл бүртгэгджээ.
Дуудлага, мэдээллийг тус аймгийн цагдаагийн газраас шалгахад хээрийн түймрийн утаа, шороон шуурганы улмаас үзэгдэх орчин хязгаарлагдсанаас болж осол гарсан нь тогтоогдсон байна.
Улмаар "Beiben North Benz" маркийн таван тээврийн хэрэгсэл мөргөлдсөн бөгөөд тухайн осолд мөрдөн шалгах ажиллагаа явуулж байгаа аж.
Ослын улмаас 50 настай эрэгтэй гэмтэж, аймгийн Нэгдсэн эмнэлэгт ухаангүй эмчлэгдэж байгаад нас барсан болохыг цагдаагийн байгууллагаас мэдээллээ.
