Өнгөрсөн долоо хоногт УИХ-ын гишүүд болон улс төр халуухан сэдвээр дүүрэн байлаа. АТГ-ын дарга асан Н.Ганболд чөлөөлөх асуудал хэлэлцэж байхад гишүүд нэлээд хэдэн хэргийн талаар тайлбар авч, асуудалтай холбоотой хэд хэдэн зүйлийг хэлсэн. Энэ үеэр үг хэлсэн УИХ-ын гишүүн Н.Алтанхуягийн үг танхимд сууж байсан гишүүд болон ард түмний анхаарлыг ихэд татлаа.
Н.Алтанхуяг гишүүн хэлэхдээ “Намайг АН-ын дарга байхад Ерөнхийлөгчийн саналаар Н.Ганболдыг АТГ-ын даргаар томилж, дэд даргаар нь Б.Хурцыг томилж байсан. Энэ бүх хүмүүс нийлээд өнөө хонгилыг үүсгэсэн. Үнэн үг хэлсэн хүнд Ерөнхийлөгч хүртэл өшөөтэй. Н.Ганболд даргаа, Та хоншоор гаргаж чадаагүй, хонгил нээдэг хүн л болсон. Би таныг өрөвдөж байна. Та хожим дурсамжиндаа бүх үнэнийг бичээрэй. Одоо хэлж чадахгүй байж магадгүй. Та нар бол хүнийг барьж, хорьдогоороо дэндсэн хүмүүс. Манай Засгийн газрын үед арай ч ийм байгаагүй юм. Дараа нь хэнийг тавих гэж таныг чөлөөлж байгаа юм бол. Та хонгилын хаалга нээж хуйвалдаанд оролцохоос залхсан уу, нэг л юм болоод ажлаа өгч байна. АТГ бизнесмэнүүдийг бүгдийг нь алсан. Монголд бизнес эрхэлж байхаар УИХ-ын гишүүн болъё гэсэн олон залуус байна. АТГ-ын ажилчид өөрсдөө авлига авдаг. АТГ-ын ажилтан нь өөрөө Ерөнхий сайдын зөвлөх болчихсон байна. Ийм зүйл байж болохгүй” гэсэн юм. Тэрбээр энэ хэлсэн үгээрээ Ерөнхийлөгчийг дахин шүүмжлээд авав. Бас Ерөнхийлөгч өөрийн гар, хөл болох байгууллагаараа улс төрчдийг шалгуулдаг, барьж хориулдаг гэх утга санааг нийгэмд ойлгууллаа. Сонгууль дөхсөн энэ үед олигтойхон ажиллаад хэн нэгнийг барьж, хорьж чадсангүй хэмээн АТГ-ын даргыг сольж байгаа мэт мэдээлэлийг ард түмэнд өглөө. Бас үгүйсгэх аргагүй юм. Ерөнхийлөгчийн овоо хараанд байгаа МАХН-ын дарга Н.Энхбаяр болон УИХ-ын гишүүн Х.Баттулга нарыг шалгаж байгаа энэ үед Н.Ганболдод энэ хүмүүсийг шалгаж нэг талд нь багтаа эсвэл ажлаа өг гэсэн шахалтыг Ерөнхийлөгч үзүүлсэн байж болзошгүй.
Н.Алтанхуяг гишүүн нэлээд хэдэн хоногийн өмнө мэдэгдэл хийж “түүнд таалагдаагүй, барьцаалах боломжгүй, золиослох шаардлагатай хүмүүсээ ямар ч шударга ёсны хэмжүүр байхгүйгээр зохиомол хэрэг үүсгэн, ялтан хэрэгтэн болгож чадаж байна. Тэд ашиглах гэсэн зарим хүмүүсийн шийдвэр гаргах эрхийг нь сүрдүүлэн барьцаалаад сейфэнд хийгээд барьцаалагчихдаг болсон. Тэр хүн бол “Шударга байцгаая” гэж гарч ирсэн Монгол Улсын Ерөнхийлөгч Цахиагийн Элбэгдорж" хэмээн хэлсэн.
Ингэж хэлсний дараагаар Ерөнхийлөгч Ц.Элбэгдоржоос ямар нэгэн реакци Н.Алтанхуяг гишүүнд ирсэн байх магадлалтай байна. Тэрбээр "Үнэн үг хэлсэн хүнтэй Ерөнхийлөгч хүртэл өшөөтэй" гэж хэлсэн. Үүнээс үзвэл дээрх мэдэгдэл хийснээс Н.Алтанхуяг гишүүнд ямар нэгэн дарамт шахалт ирсэн нь ойлгомжтой боллоо.
Н.Алтанхуяг гишүүн чуулганаар үеэр олон чухал мэдээлэл өгсөн бөгөөд түүний дотор “Монголд бизнес эрхэлж байхаар УИХ-ын гишүүн болъё” гэж хэлсэн үг байлаа. Өнөөдөр Монгол Улсад бизнес хийхэнд маш хүнд, түүний хажуугаар улс төрийн шахалт дарамт их ирдэг. Мөн татварын орчин бизнес хийхэд мөн л дарамт учруулдаг. Хэн нь хэндээ хэдэн төгрөг өгч, хэнийхээ эрх ашгийг төлөөлөх нь хэнд хамаатай юм бэ гэж асуудалд хандаж болно л доо. Бид өнөө хүртэл тэгж ч явж ирсэн. Гэвч болохгүй учир бас байдаг юм байна. Байх байхдаа бүр олон сөрөг муу талтай. Юун түрүүнд мөнгөний сонгууль гэгч нь жинхэнэ утгаараа болно. Мөнгөтэй нь л ялна. Тэгш, шударга өрсөлдөөний тухай хэн ч, юу ч гэж яриад нэмэргүй. Өнөөдөр Н.Алтанхуяг гишүүний ярьсан шиг “Монголд бизнес эрхэлж байхаар УИХ-ын гишүүн болъё” гэсэн бодолтой бизнесмэнүүд улс төрд нэр дэвших гэж байна. Тодруулбал, “Дорнын говь”-ийн Б.Дэлгэрсайхан, Дорноговь, Говьсүмбэр аймагт МАН-аас “Сод Монгол” группийн Ц.Анандбазар, Өмнөговь аймагт УИХ-ын гишүүн, “Ажнайн” гэх тодотголтой Д.Бат-Эрдэнэ АН-аас нэр дэвшинэ. Мөн Жастын Батхүү, “Монголын үр тариа эрхлэгчдийн газар тариалангийн холбоо”-ны ерөнхийлөгч Л.Цандэлэг, “Моннис”-ийн Б.Чулуунбаатар, “Оргил” худалдааны төвийг үүсгэн байгуулагч Ж.Ганбаатар мөн л нэр дэвшихээр зэхэж байна. Махны наймаагаар бизнесээ эхлүүлж, улмаар Сэлэнгэ аймгийн Ерөө суманд Хятадуудтай хамтарч “Болдтөмөр Ерөө Гол” ХХК-ийг үүсгэн байгуулж, хувийн хэвш¬лийнхнээс анх удаагаа өөрсдийн хөрөн¬гөөр төмөр зам тавьж зүтгүүр, ачааны вагон зэргүүдийг оруулж ирэн Монголын баялгийг урд хөрш рүү боловсруулаагүй чигээр нь гаргаж хөлжсөн Б.Дэлгэрсайхан гэгч орон гэр, хөрөнгө чинээгээ засаж, тохижуулсны эцэст их улс төрд орохоор шийджээ. Ц.Анандбазарын хувьд өмнөх сонгуульд нэр дэвшихээр яригдаж байсан ч бусдын эд хөрөнгөд халдан, улсын хөрөнгө шамшигдуулсан гэх үндэслэлээр шалгаж, сонгуулийн дараа суллаж байсан юм. Энэ мэтчилэн мөнгөтэй бинес эрхэлдэг хүмүүс улс төр лүү орохоор зүтгэж эхэллээ. Энэ бүх хүмүүсийг улс төрлүү орох сонголтыг өнөөгийн зөөлөн суудалд тухалж байгаа хүмүүс хийж байгаа нь ойлгомжтой. Гэхдээ улстөрд мөнгөтэй хүн бүр орно гэвэл төр, засаг юу болж хувирах вэ. Мөнгөтэй бүхэн төрд шургалдаггүй юм шүү. Мөнгөөрөө мөрөн урсгаж болох хэдий монголчуудыг хуурч бас дөнгөхгүй л болов уу.
