Дэлхийн шинжлэх ухааны өдрийг жил бүрийн арваннэгдүгээр сарын 10-нд тэмдэглэдэг. Тус өдрийг тохиолдуулан Санхүү, эдийн засгийн их сургууль /СЭЗИС/ Нийслэлийн Бизнес инновац хөгжлийн газартай хамтран Улаанбаатар инновацын төвд “Science on hub” үйл ажиллагааг зохион байгууллаа.
Энэ үеэр СЭЗИС-ийн тэргүүлэх профессорууд хэрэгжүүлэхээр төлөвлөсөн судалгааны болон төсөлт ажлуудынхаа талаар танилцуулж, хамтран ажиллах судлаач багш нарынхаа багийг бүрдүүлэх ажлыг эхлүүлэв. Тус сургууль энэ жил “Академик энтрпренершип” болон “Ногоон экспорт буюу хөдөө аж ахуйн бүтээгдэхүүний экспортыг хөгжүүлэх загвар” зэрэг томоохон ажлуудыг Монгол Улсад анх удаа хэрэгжүүлж эхэлж байна. Мөн судлаач багш нар цаашид судалгааны ажлаа хөгжүүлэхтэй холбоотой 14 үндсэн асуудлаар өөрсдийн шийдэл, саналуудыг танилцууллаа. Түүнчлэн Иркутскийн судалгаа, техникийн үндэсний их сургуулийн тэнхимийн эрхлэгч, доктор Афанасьев Александр Диомидович илтгэл тавьж, цаашдын хамтарсан судалгааны талаар санал бодлоо солилцов.
НИЙСЛЭЛИЙН БИЗНЕС ИННОВАЦ ХӨГЖЛИЙН ГАЗАР
