Баруун бүсийн босоо тэнхлэгийн авто замын хамгийн хойд хэсэг болох Цагааннуур-Улаанбайшинт чиглэлийн 25,8 км хатуу хучилттай авто зам энэ сарын 20-ны өдөр ашиглалтад орлоо.
Азийн хөгжлийн банкны санхүүжилтээр Баян-Өлгий аймгийн нутаг дэвсгэрт барьсан Өлгий-Толбо чиглэлийн 60 км, Өлгий-Цагааннуур чиглэлийн 70 км хатуу хучилттай авто зам 2014 онд, Толбо-Хашаатын даваа хүртэлх 60 км зам 2019 онд тус тус ашиглалтад орсон ба Баруун бүсийн босоо тэнхлэгийн авто замын хамгийн сүүлчийн хэсэг болох Цагааннуур-Улаанбайшинт чиглэлийн замын хэсэг баригдаагүй үлдээд байсан юм.
Улмаар тус замын гүйцэтгэгчээр БНХАУ-ын "Лонгжиан роуд энд бридж" компани ажиллаж, 25.8 км хатуу хучилттай авто замыг ийнхүү ашиглалтад оруулж байна. Цагааннуур-Улаанбийшинт чиглэлийн авто зам ашиглалтад орсноор баруун бүсийн босоо тэнхлэгийн авто замыг хөгжүүлэх төсөл бүрэн дуусаж Азийн авто замын сүлжээтэй холбогдож байна. Азийн авто замын сүлжээний АН-4 зам нь ОХУ, Монгол Улс, БНХАУ гурван улсын Новосибирк - Барнаул - Горно Алтайск – Ташанта – Улаанбайшинт – Ховд – Ярант – Такешкен – Өрөмч – Каши - Хонкираф гэсэн чиглэлээр дайран өнгөрч, Монгол Улсын нутаг дэвсгэрээр нийт 756 километр үргэлжлэх юм.
