Ц.Энхтүвшин, "Таван цагариг"
Бахрейны Манама хотноо болж буй хүндийг өргөлтийн Ази тивийн аварга шалгаруулах тэмцээний (эрэгтэйчүүдийн 50 дахь, эмэгтэйчүүдийн 31 дэх удаагийн) эмэгтэйчүүдийн 59 кг-ийн жинд Монголын шигшээ багийн тамирчин Энхбаатарын ЭНХТАМИР огцом өргөлтөөр мөнгөн медаль хүртлээ.
Э.Энхтамир огцомд (86, 89, 92) 92 кг-ийг өргөсөн бол алтан медаль хүртсэн Вьетнамын туйванч 93 кг-ийг огцомдлоо.
Түлхэлттэй өргөлтөд Э.Энхтамир эхний захиалгаа 106 кг -ийг өргөсөн. Дараа нь 112 кг-ийг захиалсан ч хоёр оролдлого хийгээд амжилттай болсонгүй.
Ингээд нийлбэр дүнгээр ( 92+106 ) 198 кг-ийн амжилт үзүүллээ.
Түлхэлттэй өргөлт болон нийлбэрээр хараахан медальд хүрэх боломжгүй болсон ч Монголын багийн "салхийг хагалж", Азийн аваргын мөнгөн медаль хүртлээ, Э.Энхтамир.
Манай бусад туйванчид маань аравдугаар сарын 12-нд 71 кг-ийн жинд Оюутны ДАШТ-ий мөнгөн медальт Г.Ануужин, аравдугаар сарын 13-нд 76 кг-ийн жинд Д.Дархижав, аравдугаар сарын 14-нд -87 кг-ийн жинд Монгол Улсын гавьяат тамирчин, Дэлхийн аварга М.Анхцэцэг дэвжээнд гарах юм.
