Баянгол дүүргийн 19 дүгээр хороонд байрлах 61 дүгээр байрны урд талын түшиц хана хуучирч муудан, улмаар хоёр талд нь байрлах угсармал бетонон шат, түүнийг холбосон явган хүний зам цөмөрч, хагаран иргэд зорчих боломжгүй болоод байсан.
Тиймээс дээрх түшиц ханыг дүүргийн төсвийн хөрөнгө оруулалтаар засварлах ажлыг өнгөрсөн наймдугаар сараас эхлүүлсэн бөгөөд одоогийн байдлаар түшиц ханыг бүрэн засварлажээ.
Ингэхдээ түшиц хана дээгүүрх 100 метрийн урттай явган хүний замыг 3-4 метр өргөн болгон шинэчилж зассанаас гадна түшиц хана дагуу байрладаг 13 гараашны хаалга дэлгэгдэж онгойдог байсныг сөхөгддөг автомат хаалгаар сольсон байна. Мөн түшиц хананы зүүн талд хөгжлийн бэрхшээлтэй иргэд аюулгүй зорчих, байрны арын саад руу чөлөөтэй орж, гарах, амрах боломжийг бүрдүүлэх зорилгоор зориулалтын шат хийжээ.
Ташрамд дурдахад, өнгөрсөн онд Баянгол дүүргийн 17, 18, 19 дүгээр хорооны нутаг дэвсгэр, Чингүнжавын гудамжийг Амарсанаагийн гудамжтай холбох 0.96 км авто замын нөлөөлөлд өртсөн тоосгон 50 гараашийг чөлөөлж авто зам, явган хүний зам шинээр тавьсан. Ингэхдээ авто замын зорчих хэсгийн өргөн 5-5.5 метр байсныг зургаан метр болгон өргөсгөж, замын урд талдаа хоёр метр өргөнтэй явган хүний зам тавьсан нь иргэдийн талархал хүлээгээд байгаа гэж нийслэлийн Сургалт, судалгаа, олон нийттэй харилцах газраас мэдээллээ.
