"Монголын эмэгтэйчүүдийн холбоо"-ны санаачлагаар "U Film" уран бүтээлийн нэгдэлтэй хамтран Төр нийгмийн зүтгэлтэн зохиолч С.Удвал агсны тухай "Улаан цэцэг" түүхэн киног хамтран бүтээсэн. Энэ киноны орлогоор 2022 онд "ХАВДАРГҮЙ МОНГОЛ ЭМЭГТЭЙ” нийгмийн зорилтот төслийг хэрэгжүүлнэ хэмээн "Монголын эмэгтэйчүүдийн холбоо"-оос мэдэгдсэн юм. Тэгвэл тус төсөл энэ сарын 08-аас эхлэн Говь-Алтай аймгаас эхлэхээр болсон байна. Тодруулбал, Говь-Алтай аймгийн бүх сумдаар “Явуулын эмнэлэг” буюу “Mobile cliniс” эмнэлэг Умайн хүзүүний хорт хавдар, Хөхний хорт хавдрын эрт үзлэг, оношлогоо хийж, эрүүл мэндийн боловрол олгох төсөл хэрэгжих аж. Умайн хүзүүний хорт хавдрын нас баралтаараа монгол эмэгтэйчүүд Ази, Номхон далайн бүс нутагт тэргүүлдэг гэсэн судалгаа байдаг. Монголд зонхилон тохиолддог хавдрын нас баралтын хоёрдугаарт орж байна. Мөн үүнээс гадна эмэгтэйчүүдийн хөхний хорт хавдрын өвчлөл болон энэ өвчнөөр нас баралт нэмэгдэх магадлалтай орнуудын тоонд Алжир, Энэтхэг, Африкийн зарим орнуудын хамтаар манай улс дээгүүр байрт явж байгаа болохыг Дэлхийн эрүүл мэндийн байгууллагын мэдээнд дурдсан байдаг. Иймээс "Монголын эмэгтэйчүүдийн холбоо" “Хавдаргүй монгол эмэгтэй” төслийг эхлүүлж, орон нутагт явуулын эмнэлэг очиж, энэ төрлийн хорт хавдрыг эрт илрүүлэх үзлэг оношлогоо хийхээр төлөвлөн ажлаа эхлэж байна.
Нэмэлт мэдээлэл дуулгахад тус төслийн нээлт Говь-Алтай аймагт энэ сарын 08-ны өдөр болох бөгөөд нээлтэнд "Монголын эмэгтэйчүүдийн холбоо"-ны Ерөнхийлөгч Б.Оюунгэрэл, "Хавдар судлалын үндэсний төв"-ийн "Хөхний төв"-ийн эрхлэгч П.Батсүх, "Монголын эмэгтэйчүүдийн холбоо"-ны Соёлын түгээгч, МУАЖ А.Долгор, "Монголын эмэгтэйчүүдийн холбоо"-ны Соёлын түгээгч, СТА, дуучин С.Гантогоо, "Хавдар судлалын үндэсний төв"-ийн Эмэгтэйчүүдийн мэс заслын тасгийн эмч Г.Ням-Од нар оролцох аж.
