Баянгол зочид буудлыг цагдаагийн тусгай албаныхан хамгаалалтанд авч, хэнийг ч гаргаж, оруулахгүй байгаа талаарх мэдээлэлийг өмнө хүргэсэн. Одоогийн байдлаар Баянгол зочид буудлын гадаа УИХ-ын гишүүн М.Зоригт, Нийслэлийн Засаг дарга Э.Бат-Үүл, УИХ-ын дарга З.Энхболдын зөвлөх Г.Байгалмаа, Сүмогийн аварга Д.Дагвадорж, АН-ын бүлгийн дарга Гарамгайбаатар нар ирсэн бөгөөд гадаа нь хүлээж байна. Тэд энэ талаар ямар байр суурь илэрхийлснийг хүргэе.
УИХ-ын дарга З.Энхболдын зөвлөх Г.Байгалмаа: -Фэйсбүүкээр мэдээлэл аваад ирлээ. УИХ-ын гишүүний халдашгүй дархан байдалд халдаж, хууль зөрчиж байгаад харамсаж байна. Х.Баттулгатай холбоотой төмөр замын асуудал, мэдээлэл нь олон нийтэд нээлттэй байгаа.
Зам тээврийн сайд М.Зоригт:- Энэ тухай мэдээллийг сошиалаас аваад ирлээ. Арай үгүй байлгүй дээ.
Нийслэлийн Засаг дарга Э.Бат-Үүл: - Нэгжлэг хийхэд яагаад тусгайгийнхан ирдэг юм. Хуулиар бол нэгжлэг хийх гэж байгаа бол мөрдөн байцаагч, прокурор хийх ёстой. Би сошиалаар мэдээлэл аваад ирлээ.
Их аварга Д.Дагвадорж: - Би дөнгөж сая твиттерээс мэдээлэл аваад яарч сандраад ирлээ. Хамтдаа хүлээцгээе. Учрыг нь лавлая
АН-ын бүлгийн дарга Гарамгайбаатар: Ямар ч мэдээлэл байхгүй болохоор хариулт өгөх боломжгүй байна. Би үүнийг харах гэж ирсэн. Х.Баттулгыг баривчлах гэж байна гэх мэдээллийг ордноос аваад ирлээ.
