Аялагчдын дутуу унтраасан галаас ойн түймэр дэгдсэнийг унтраажээ

Өвөрхангай аймгийн Бат-Өлзий суманд аялсан иргэд галаа дутуу унтрааж орхисноос түймэр дэгдсэнийг нутгийн иргэд унтраажээ.

Ойн түймэр нь тухайн орчин, цаг агаар, салхины хурднаас шалтгаалж газар авах эрсдэлтэй байдгийг Экологийн цагдаагийн албанаас анхаарууллаа.

Хэрэв хөдөө хээрт түймэртэй тулбал нэн түрүүн өөрийн болон бусдын аюулгүй байдлыг анхаарч, үүний дараа онцгой байдлын албаныханд байрлалаа мэдэгдэх хэрэгтэй. Гал сөнөөгчид ирэх хүртэл, түймрийг унтраахын тулд галын гурвалжийг эвдэх буюу хүчилтөрөгчгүй болгох, дулааныг үгүй хийх, шатах материалыг устгах арга хэмжээг авч болно.

Мөн түймэрт шороо асгах эсвэл галыг цохиж унтраах боломжтой. Эсвэл галын дөлний суурь хэрэг рүү ус цацаж унтраах нь үр дүнтэй. Мөн эргэн тойрны шатах материал болох газарт унасан жижиг бургас, навч зэрэг хогийг цэвэрлэж холдуулахыг зөвлөлөө.