УИХ-ын ээлжит сонгууль дөхсөн эл өдрүүдэд АН-ын алиа хошин гэнэтийн бэлгүүд тасрахгүй нь бололтой. АН-ын босс С.Эрдэнэ эзэндээ гологдож, хаягдсан бас өөрөө өөрийгөө ч мэдэж, танихаа больсон хүмүүст хадаг яндар барьж, намынхаа батлахыг өвөртлүүлж байна. Тухайлбал, С.Эрдэнэ дарга МАХН-аас нэр дэвшин сонгогдсон О.Баасанхүү, бие даагч С.Жавхлан, Ерөнхийлөгчийн зөвлөх Г.Уянга нарыг намдаа элсүүлэн нэр дэвших эрх өгч байгаа нь боловсон хүчнийх нь бодлого ямар хэмжээнд хүрснийг харуулж байна.
Одоогоос ердөө сарын өмнө “АН-ын дэнчингийн мөнгө бол 60 тэрбумын схем” хэмээгээд “АН-ын өнөөх л С.Эрдэнэ, Ц.Элбэгдорж, Э.Бат-Үүл цоройсон бүхнийг цавчиж, торойсон болгоны толгойг тасадсаар өөрсдөө буг боллоо” гэж өөрийн цахим хуудсаар бичиж байсан Г.Уянга АН-ын үнэмлэхийг гардан авч, өөрөө өөрийгөө үгүйсгэсэн.
“Намд итгэх хэрэггүй, тэд бүгд хулгайч, луйварчид” хэмээн орилж, морьтой давхисаар УИХ-ын гишүүн болсон С.Жавхлан шүүр барьж, хог шуудайлсаар АН-ын хаяг бараадсан юм. Өнгөрсөн дөрвөн жилийн хугацаанд УИХ-ын нэгдсэн чуулганд Төрийн дууллыг дуулж хувь нэмэр оруулснаас биш хууль санаачилж, тойргоо тордох ажилд гар бие чилээгээгүй нэгэн. Тиймдээ л тойрогтоо эргэн очих нүүргүй болсон тул үзэл бодлоосоо ухарч, ичих нүүрээ элгэндээ нааж С.Эрдэнийн эвээлд багтаад байгаа билээ.
Ингэж л АН-ыг үгүйсгэж, эсэргүүцэж явсан хүмүүс С.Эрдэнийн ивээлд орлоо.