Хүнс, хөдөө аж ахуй, хөнгөн үйлдвэрийн сайд асан Б.Батзориг өнгөрсөн долоо хоногт УИХ-ын гишүүнээсээ чөлөөлөгдөх хүсэлтээ өгсөн билээ. Тэрбээр ЖДҮ-ийн зээлийн зориулалтын бус хууль бусаар ашигласан гэх үндэслэлээр шалгагдаж байгаа юм. Түүнд холбогдох хэргийн шүүх хурал өнөөдөр /2020.04.06/ Баянзүрх дүүргийн Эрүүгийн хэргийн анхан шатны шүүхэд болно.
Тэрбээр энэ талаараа өөрийн цахим хуудаснаа "Гишүүний бүрэн эрхээс чөлөөлөгдөх хүсэлтээ УИХ-ын даргад гаргалаа. Миний бие өнөөдрөөс эхлээд улстөрөөс ангид байж хариуцлагаа хүлээнэ. Болж өнгөрсөн үйл явдалд тайлбар хэлэх цаг хугацаа өнөөдөр биш. Хэзээ нэгэн цагт цээжээ онгойтол ярих өдөр ирэх бизээ. Цаг хугацаа бүх юмны хэмжүүр болох байхаа. Өөрийгөө өмгөөлөх, тайлбар тавих сэтгэл алга. Өнөөдөр хэлэх ганцхан үг минь УУЧЛААРАЙ" гэсэн байна.