Интерполоор хайж буй “Либерти Партнерс”-ын захирал Ч.Ганбат Америкаас “олдсон” талаар бид мэдээлж байсан билээ. Тэрбээр Сингапураас БНСУ руу, тэндээсээ АНУ руу АНУ-ын иргэний үнэмлэхээрээ нэвтэрсэн болох нь тогтоогдсон. Өөрөөр хэлбэл манай улсын хилээр гарахдаа Монгол улсын иргэн, АНУ-ын хилээр орохдоо АНУ-ын иргэн болчихсон байгаа юм. Уг нь манайх давхар иргэншлийг зөвшөөрдөггүй. Тиймдээ ч Монгол улсын гавьяат тамирчин Д.Мөнхбаярын нарын хүмүүс эргэн эх орноороо харьяалагдаж чадахгүй байгаа. Гэтэл “Либерти Партнерс”-ын захирал Ч.Ганбат гэгч хууль бусаар буюу давхар харьяалалгүй оронд тусгайлан давхар харьяаллын эрх эдэлдэг байсан нь нэгэнт тогтоогдчихоод байгаа. Учир нь Ч.Ганбат Монгол улсын иргэнээс татгалзах хүсэлтээ Ерөнхийлөгчид өргөн бариагүй юм.
Тэгвэл түүний талаарх дахин нэг ноцтой баримт батлагджээ. Тэрбээр хуурамч материал бүрдүүлэн хэд хэдэн гадаад паспорт авсан байх магадлал өндөр байна. “Либерти Партнерс”-ын захирал Ч.Ганбат нь Интерполоор мөнгө угаасан болон мөнгө завшсан хэргээр эрэн сурвалжлагдаж байсан.
Гэтэл түүний биед АНУ-ын иргэний паспорт болон Монгол улсын гадаад паспорт таван ширхэг байсан нь илэрчээ. Хууль хяналтынхан ч түүний нэр дээр А серийн буюу албаны А0030.., А0021.. гэсэн хоёр, Е серийн буюу энгийн улаан паспорт Е548.., ЕО548.., ЕО066.. гэсэн гурван паспорт бүртгэлтэй байгаа нь тогтоогдсон байна.
Ч.Ганбатын хувьд АНУ-ын иргэн болсонтой нь холбоотойгоор баривчлан шалгахад хүндрэлтэй болж Б.Хурцын нэгэн адил нутагт нь эргүүлэн авчрахад цаг хугацаа шаардлагатай болсон. Гэвч тэрбээр монголын улсын таван гадаад паспорттойгоо өнөө ч Англи, Америк хоёрын дунд явж, Ухаахудаг – Гашуун чиглэлийн 267 км төмөр замын бүтээн байгуулалтын ТЭЗҮ, зөвлөх үйлчилгээг боловсруулсан гэх “Сиднейн Аустинг” компанийн удирдлагуудтай уулзсаар АНУ-д төвхнөсөөр явна.
