Монголын дипломат паспорттай хоёр иргэн 70 кг героин төрлийн мансууруулах бодис тээвэрлэж байсныг илрүүлсэн талаар мэдээлэл цацагдаж шуугиан тарьсан билээ. Энэ асуудлаар өчигдөр ГХЯ-ны Консулын газрын дарга Л.Мөнхтүшиг мэдээлэл хийхдээ "Энэ оны тавдугаар сарын 3-ны өдөр ХБНГУлсын Дрезден хотын хилийн шалган нэвтрүүлэх постоор нэвтрэх гэж байсан Монгол Улсын ДТГ-ын дипломат дугаартай автомашиныг саатуулан шалгахад 70 кг геройны төрлийн мансууруулах бодис тээвэрлэж явсан нь урьдчилсан байдлаар тогтоогдсон. Энэ хэрэгт монгол иргэд холбоотой эсэх талаар нарийвчлан шалгах шаардлага байгаа. Хэрэгт шалгагдаж байгаа хоёр хүн нь Истанбул дахь Ерөнхий консулын газарт ажилладаг. Нэг нь дипломат ажилтан, нөгөө нь жолооч. Хэргийг хянан шалгах ажиллагаа явагдаж, эцэслэгдээгүй байгаа тул эдгээр хүний нэрийг одоогоор олон нийтэд мэдэгдэх боломжгүй байна" гэсэн мэдээллийг өгсөн. Тэгвэл уг хэргийг үйлдсэн хүмүүс нь Истанбул дахь Ерөнхий консулын газрын дэд консул Бат-Эрдэнийн Баттүшиг, жолооч Э нар байсныг албаны эх сурвалж мэдээлсэн байна. Бат-Эрдэнийн Баттүшиг нь БНТУ-ын Истанбул дахь Ерөнхий консулын газарт Дэд консулын албан тушаалд 2018 оны 7 дугаар сарын 1-ний өдөр томилогдож байжээ.
