АН-ын дэд дарга, УИХ-ын гишүүн асан Г.Батхүү өнгөрсөн тав дахь өдөр зуурдаар таалал төгссөн талаар мэдээлсэн. Тус хэргийн талаар өчигдөр буюу нэг дэх өдөр АН-аас мэдээлэл хийсэн юм. АН мэдээлэл хийхдээ "талийгаач гадны нөлөөтэй өнгөрсөн байж болзошгүй, хамгийн сүүлд МАН-ын гишүүнтэй уулзсан нь тогтоогдсон" гэсэн мэдээлэл хийсэн юм. Тэгвэл хамгийн сүүлд талийгаачтай уулзсан хүн нь Н.Номтойбаяр гишүүн юм байна. Энэ талаар УИХ-ын гишүүн Н.Номтойбаяр " 17-ны орой бид хоёр ордонд таараад манай өрөөнд орсон. Өмнөх УИХ-д хамт сууж байсны хувьд, бас адилхан авто спорт сонирхдог, холбоо удирддагийн хувьд уулзаж ярилцсан. Цаг хугацааг нь тооцоод үзэхээр сүүлд уулзсан хүн нь яах аргагүй би. Талийгаачийг манай өрөөнөөс гараад явсны дараа 19.18 цагт би бүлгийн хуралд орсон. Цагдаагийн байгууллага надаас гэрчийн мэдүүлэг авсан. Би өчигдөр гэрчийн мэдүүлэг өгсөн” хэмээн хэлсэн юм.
Уг үйл явдал болсон өдөр УИХ-ын гишүүн Н.Номтойбаярыг согтуу байсан талаар мэдээлэл гараад байгаа юм. Энэ талаар УИХ-ын гишүүн Н.Номтойбаяр "БНХАУ руу айлчлалаар яваад ирсэн гишүүд өдрийн хоолонд хамт ороод Шин Жиньпин даргын өгсөн бэлэг гээд нэг шил архи задалсан нь үнэн. Түүнээс биш халамцуу явж байсан гэдэг бол худлаа" гэсэн хариултыг өгсөн. Үнэн хэрэгтээ УИХ-ын гишүүн Н.Номтойбаяр баасан гарагийн орой 19.18 цагийн үед бүлгийн хуралд оролцохдоо халамцуу байсан аж. Тодруулбал, УИХ дахь МАН-ын бүлгийн хурал дээр УИХ-ын гишүүн Н.Номтойбаяр халамцуу орж ирээд Ерөнхий сайд, МАН-ын дарга У.Хүрэлсүх рүү нэлээд хэдэн үг хэлж, хэрүүл өдсөн байна. Улмаар нөхцөл байдал ширүүсч эхэлсэн тул Н.Номтойбаярыг Батлан хамгаалахын сайд Н.Энхболд хурал болж байсан танхимаас авч гарсан байна.
Тэгэхээр талийгаачийг өнгөрсөн өдөр УИХ-ын гишүүн Н.Номтойбаяр нарын нэр бүхий гишүүд Шин Жиньпин даргын өгсөн архийг задалж уусан байна. Яг тэр үед талийгаач хамт байсан эсэх, архи уусан байсан эсэх нь тодорхойгүй байгаа ч нэлээд сэжиг бүхий байна. Хэргийг цагдаагийн байгууллага шалгаж эцсийг нь тогтоох биз ээ.
