ОХУ-ын Кемерово мужийн худалдааны төвд томоохон түймэр гарч, олон тооны хүн амь үрэгдсэн харамсалтай хэрэг гарсан. Амиа алдсан хүмүүсийн тоо 69-д хүрсэн талаарх мэдээлэл зарим хэвлэл мэдээллийн хэрэгслээр гарсан. Мөн цаашид амиа алдсан хүмүүсийн тоо нэмэгдэж магадгүй байгааг Оросын Онцгой байдлын газраас мэдээлжээ. Түүнчлэн зарим иргэний цахим хуудсандаа бичиж байгаагаар 400 гаруй хүн амиа алдсаныг албаныхан нуун дарагдуулж байна гэжээ.
Гал түймэрт 8 настай хүүгээ алдсан Дмитрий Пучков “Би одоо юу хэлэх, юу хийх ёстойгоо мэдэхгүй байна. Хүү минь тоглоомын газарт очьё гэж гуйхад нь зөвшөөрөх ёсгүй байж. Бас би тэнд ганцааранг нь орхисон. Хүү минь тоглох гэж очоод шатаад үхчихлээ. Түүнийгээ түймэрт өргөсөндөө өөрийгөө хэзээ ч уучлахгүй” гэж ярьжээ. Талийгаачдыг өнөөдөр оршуулах юм байна.