УИХ-ын гишүүн М.Зоригт ирэх сонгуульд нэр дэвшихгүй гэдгээ өмнө нь мэдэгдсэн. Гэтэл Зам тээврийн сайд М.Зоригт өнөөдөр өглөө энэ шийдвэрээ өөрчлөн Дорнод аймгаас нэр дэвшихээр болсон байна. Энэ талаар Зам тээврийн сайд М.Зоригтоос тодрууллаа. .
-Таныг Дорнод аймгаас нэр дэвшихээр болсон гэж сонслоо. Та Сүхбаатараас гарч ирсэн гишүүн. Харин одоо яагаад Дорнодоос нэр дэвшихээр болов?
-Өнөөдөр бие даагч Х.Болорчулуун МАН-д элсэж Дорнод аймгаас нэр дэвшиж, тоглох гэж байгаа мэдээ твитэр дээрээс харсан. Тэгж ард олноороо, аймаг нутгаар нь тоглуулмааргүй байна. Өнгөрсөн дөрвөн жилийн хугацаанд бие даагч Х.Болорчулуун гишүүн хувийн ашиг хонжоо хайж, өөрийн бизнесээ өргөжүүлж, садан төрлөө ажилтай болгосоноос өөр юу хийсэн юм бэ? юу ч хийгээгүй. Одоо МАН-д элсэж цаашаа тоглолт хийх гэж байгаа бол, тэрийг хэзээ ч хүлээн зөвшөөрөхгүй. Тэгж болохгүй. Тийм учраас Дорнод аймгаас нэр дэвшинэ гэдгээ мэдэгдэж байна.
-Таныг энэ шийдвэрийг намыхан чинь хэр дэмжих вэ?
-Зам тээврийн сайд Төмөрхүүг ажлаа хийгүй байхаар “Би Зам тээврийн сайд болно гээд л болсоныг та нэр мэдэж байгаа. Өнөөдөр би зам тээврийн сайд болсоныг харж байгаа байх. Ер нь бол улс орон, аймаг нутгаар тоглож байгаа этгээдийг давруулмааргүй байна. Би тийм учраас дэвшинэ гэдгээ хэлж байна.
-Та Сүхбаатар аймгаас сонгогдсон гишүүн. Энэ сонгогдсон хугацаандаа хэр их ажил хийв. Өөртөө ямар дүн тавьж байна вэ?
-Сүхбаатар аймгийн сонгогчид надад дүн тавьж байгаа. Дүн бол муу биш. Ер нь бол Сүхбаатар аймагт АН засаг барьсан энэ хугацаанд өнгө зүсээ өөрчилж чадсан. Монголын хөдөөг өөрчилж болдог жишээг бид харуулж чадсан. Би тийм мундаг байсан гэж хэлмээргүй байна. Сонгогчид өөрсдөө дүн тавих байх.
-Тойрог солиод байх чинь хэр оновчтой юм бэ?
-Нийслэлээс алслагдах тусмаа ядуурал ихэсдэг. Харин үүнийг өөрчилж болдог гэдгийг Сүхбаатар аймгаас харсан байх. Хөдөө орон нутгаа яаж хөгжүүлж, яаж амьдарч болдогийг харуулж өгсөн. Үүнийг 21 аймагт хүргэх ёстой. Яагаад тойргоо сольж болохгүй гэж. Өнөөдөр Зам тээврийн сайд байсан хүн нөгөөдөр нь Сангийн сайд болж л байдаг.
Харин энэ асуудлыг УИХ-ын гишүүн Х.Болорчулуунаас тодруулахад “УИХ-ын гишүүн Ц.Даваасүрэн бид хоёр ямартаа ч энэ чуулганыг дуустал бие даагч гишүүнээр явна. Өөрөөр хэлбэл гишүүний бүрэн эрхийн хугацаанд бие даагчаар явна” гэсэн хариулт өглөө. Харин МАН-д элссэн талаар асуухад ямар ч хариулт өгсөнгүй.
