Ерөнхий сайд Ч.Сайханбилэгийг огцруулах тогтоолын төслийг нэр бүхий 19 гишүүн УИХ-д өргөн мэдүүлсэнээр Ч.Сайханбилэгийг огцруулах асуудлыг өнөөдрийн УИХ-ын нэгдсэн хуралдааны хэлэлцэх асуудлын дөрөвдүгээрт оруулсан. Үүнээс өмнө өглөөний 08.30 цагт Төрийн байгуулалтын байнгын хороо энэ асуудлыг хэлэлцэх ёстой. Гэтэл өнөөг хүртэл хурал эхлээгүй байна. Тус байнгын хорооны хуралд АН-ынхан 100 хувийн ирцтэйгээр ирчихсэн сууж буй. Хуралд одоог хүртэл Ерөнхий сайдыг огцоруулагч Г.Уянга ирээгүй байна. Гэвч тэрбээр саяхан цахим хуудсаараа “Байнгын хорооны ирц бүрдмэгц орж асуудлаа танилцуулахаар бүтэн 3 цаг хүлээж байна” хэмээн мэдэгдсэн бол үүний хариуд Төрийн байгуулалтын байнгын хорооны дарга Бакей “Байнгын xорооны гишүүн Г.Уянга Та орж ирэxгүй байгаа тул ирц 1 xүнээр дутаж байна” гэсэн байна. Ямартай ч Ерөний сайдын огцруулах асуудал ийнхүү хаана хаанаа хүлээлттэй байна. Энэ талаар зарим жиргээчид “Ирцээ бүрдүүлэхгүй байгаа улсын аав нарт нь захидал, биш ээ SMS бичвэл яах бол... Үнэн үү? Бүгд өөрийг чинь хүлээгээд сууж байна. Олж ирсэн хүнд өндөр шагналтай гээд л яваад бна шд” гэцгээж байна.
Г.Уянга: Би 3 цаг хүлээж байна А.Бакей: Г.Уянга та ороод ирвэл ирц бүрдэх гээд байна
2016-01-21 12:04:00
