Эрүүл мэндийн салбар эх үрийг уулзуулж, өвчтэй нэгнийг эрүүл болгодог буянтай салбар. Өвчтэй зовлонтой байгаа иргэдтэй өдөр бүр тулж ажилдаг. Тиймдээ ч олон нийтээс сайн, муу хэл ам салдаггүй. Сүүлд гэхэд өнгөрсөн арваннэгдүгээр сард
анхны үрээ өлгийдөн авахаар нэгдүгээр төрөхийг зорьсон 27 настай бүсгүй хүүхдээ төрүүлээд амиа алдаж, нярай хүүхэд нь ч мөн эндсэн эмгэнэлтэй хэрэг гарсан.
Төрөх дөхсөн 27 настай эмэгтэй эмнэлэгт хэвтэж байсан ч эмч нар хайхрахгүй байсаар амиа алдсан гэж ар гэрийнхэн нь үзэж гомдолтой байгаа. Уг хэрэг явдал эцэслэн шийдэгдээгүй байхад 2 дугаар төрөх буюу "Хүрээ" амаржих газарт төрсөн бүсгүй эмч нарын буруугаас эрүүл мэндээрээ хохироод байна. Цус алдаж төрсөн бүсгүйд цус сэлбэх явцад эмч нар бүлэг андуурч хийжээ. Улмаар бүсгүй одоо болтол эмнэлэгт хэвтэж эмчлүүлж байгаа аж. Энэ мэт эмч нарын хариуцлаггүй байдлаас болж эх, үр эндэгдэж, анх төрсөн эмэгтэй онош нь тогтоогдохгүй хоёр сар эмнэлгээр явж хохирсон тохиолдол цөөнгүй байна. Бид анхны үрээ өлгийдөн авахаар эхнэрээ Нэгдүгээр амаржих газарт хэвтсэн 27 настай бүсгүйн нөхөр О.Жавхлангаас тухайн үед юу болсон талаар О.Жавхлан: Өмхий үнэртэй, бие нь замаг шиг ногоон өнгөтэй хүүхэд ирсэн шүү гэж эмч нь хэлсэн гэсэн ярилцлага авч байсан билээ. Эмнэлэгт эх, хүүхэд хоёр амиа алдсан энэ хэргийг хууль хяналтынханд шалгуулахаар ар гэрийнхэн нь харъяаллын дагуу Сүхбаатар дүүргийн цагдаагийн газарт гомдол гаргасан. Талийгаачид шүүхийн задлан шинжилгээ хийсэн бөгөөд өнгөрсөн долоо хоногт хариу гарсан гэсэн боловч ар гэрийнхэнд нь хэлээгүй хэмээн талийгаачийн нөхөр О.Жавхлан бидэнд хэлсэн юм. Тэрбээр
"Цагдаад гомдол гаргасанаас хойш нэг удаа мэдүүлэг өгсөн. Шүүх шинжилгээний хариу өнгөрсөн долоо хоногт гарсан боловч бидэнд одоо болтол мэдээлээгүй байна. Энэ талаар байцаагчаасаа асуухад одоогоор хариуг нь үзүүлэх болоогүй байна гэсэн хариу өгсөн" гэсэн юм.
Тэгвэл өнөөдөр Нэгдүгээр амаржих газрын эмчилгээ эрхэлсэн орлогч дарга Ц.Мөнхцэцэгээс цөөн асуултад зарим зүйлийг тодрууллаа.
-Харамсалтайгаар амиа алдсан эхийн шинжилгээний хариу гарсан гэсэн?
-Шинжилгээний хариуны талаар бид нар ямар ч тайлбар өгөх боломжгүй. Шинжилгээг манайхаас өөр газар хийдэг. Яагаад гэвэл энэ хэрэг цагдаагийн байгууллагад шалгагдаж байгаа учир та нарт тэр хариуг өгөхгүй гэж албан ёсоор байцаагч нь хэлсэн.
-Эмнэлгийн зүгээс тухайн өдөр гарсан эмч нарт ямар нэгэн хариуцлага тооцсон уу?
-Ер нь бол удирдлагын зөвлөлийн долоон гишүүнд бүгдэд нь арга хэмжээ авсан. Хариуцлагыг давхардуулдаггүй гэдэг утгаар нь шалгагдаж байгаа энэ асуудал дээр эмнэлгийн удирдлагуудаас тухайн өдөр ажилласан эмч нарт хариуцлага тооцох эрхгүй.Яагаад гэвэл тэр хүмүүст хариуцлага тооцоод эрхийг хасдаг эрхтэй хүмүүс бид биш. Нөгөө талаар эмнэлгийн удирдлагаас тэдгээр эмч нарыг буруутай гээд ажлаас халлаа гэхэд тэр хүн ямар нэг харьяалалгүй болчихно.
-Өөрөөр хэлбэл шүүхийн шийдвэр гартал ямар нэг хариуцлага тооцохгүй гэж ойлгож болох уу?
-Шүүхийн шийдвэр гартал ажлаа хийж байгаа хүмүүс ажлаа хийдгээрээ хийгээд л явна. Шүүхийн шийдвэр гараад буруутай нь тогтоогдвол хуулийн дагуу арга хэмжээ авах байлгүй дээ.
-Тухайн өдөр хэн гэдэг эмч ээлжинд гарч байсан юм бэ?
-Би хэн гэдэг эмч тухайн өдөр ээлжинд гарч байсныг нь мэднэ. Гэхдээ шүүхийн асуудал үүссэн учраас хэнд ч хаана ч мэдээлэл өгөхийг хориглосон.
-Ар гэрийнхэнд нь эмнэлгийн зүгээс санхүүгийн дэмжлэг, тусламж үзүүлсэн үү?
-Хуулийн дагуу санхүүгийн дэмжлэг үзүүлэх эрхзүйн үндэслэл заалт байдаггүй учраас бид нар хуулийн дагуу үйл ажиллагаа явуулж байгаа.
-Ар гэрийхний зүгээс гомдолтой байгаа. Танай эмнэлгийн зүгээс ямар нэгэн байдлаар уучлалт гуйсан уу?
-Тэгэлгүй яахав. Би тэр үед өөрөө энд байсан. Би эмчилгээ эрхэлсэн орлогч даргын хувьд ноцтой хүндрэлийн үед дуудагддаг. Тэр харамсалтай үйл явдал орой болсон ч надад тэр дор нь мэдээлээд би хугацаа алдалгүй ирсэн. Би өөрөө албан ёсоор уулзаж уучлалт гуйсан. .Энэ бол бас хүн ёсны чанарын асуудал.
-Талийгаачийн нөхөр О.Жавхлан хэн гэдэг эмч тухайн өдөр ээлжинд гарч байсан гэдгийг одоо болтол мэдэхгүй байгаа гэсэн. Тэрийг нь хэлж болдоггүй юм уу?
-Ар гэрийнхэн нь өөрсдөө мэдэж байгаа.
