МАХН-ын дарга Н.Энхбаяр өнгөрсөн 2014 онд "Монгол тулгатны 100 эрхэм" нэвтрүүлэгт оролцсон билээ. Харин уг нэвтрүүлгийн бичлэгээс хасагдсан гэх бичлэг өнгөрсөн амралтын өдрүүдэд сошиал сүлжээгээр тархлаа. Эл бичлэгт тус нэвтрүүлэгийн хөтлөгч Э.Анужингийн бухимдал, Н.Энхбаярын эхнэр О.Цолмонгийн яриа олон нийтийг гайхшруулж байна. Тодруулбал, дээрх бичлэгт Н.Энхбаярын эхнэр О.Цолмон “Би бол Н.Энхбаяраас ч илүү хор найруулж чадна, Сү.Батболд, С.Баяр нар миний дэргэд юу ч биш...” хэмээж байв.
Жил гаруйн өмнө энэ нэвтрүүлэг ихээхэн дуулиан тарьж байв. Учир нь энэ үед Н.Энхбаярыг намын байртай нь холбогдуулан эрүүгийн хэрэг үүсгээд байсан юм. Сүхбаатар дүүргийн нэгдүгээр хороонд байрлах “Империал Гоулд” ХХК-ийн өмчлөлийн 900 метр квадрат талбай бүхий тус байрыг МАХН-ын дарга Н.Энхбаяр залилан мэхлэх аргаар авсан хэмээн буруутгасан байдаг. Уг байрыг эзэмшиж байсан АНУ-ын иргэн А.Генсбургэд одоогийн МАХН-ын хоёр давхар цагаан байрыг эзэмшил газрынх нь хамт 1.5 сая ам.доллараар худалдан авахаар тохиролцсон ч үлдэгдэл нэг саяыг нь өнөөг хүртэл төлөлгүй их хэмжээний хохирол учруулсан гэж цагдаагийн байгууллагад гомдол гаргаснаар эрүүгийн хэрэг үүссэн нь тодорхой болсон юм. Тиймдээ ч үүнтэй холбоотойгоор тухайн үед “Херо Энтертайнмент”-ынхныг шалгаж байгаа гэх мэдээлэл цацагдаж байсан. Гэвч “Hero entertainment”-ынхан “Монгол тулгатны 100 эрхэм” нэвтрүүлгийн Н.Энхбаярын орсон дугаарын бичлэг алдагджээ. Өнгөрсөн амралтын өдрүүдэд цахимаар цацагдаж, оролцохдоо "хөшигний цаана" ярьсан олон зүйлс олон нийтийн сүлжээний гол сэдэв болоод байна.
Тэгвэл Н.Энхбаярын "Монгол Тулгатны 100 эрхэм" нэвтрүүлэг яагаад алдагдав. “Монгол Тулгатны 100 эрхэм” нэвтрүүлэгт өнөөг хүртэл нэлээд олон хүмүүүс оролцсон. Түүнээс яагаад зөвхөн Н.Энхбаярынх гэж...
Сүүлийн үед гарч байгаа мэдээллүүдийг сонгуультай холбох болсон. Алагдсан энэ дүрсийг ч мөн ингэж тайлбарлаж байгаа хүмүүс цөөнгүй байна. Түүгээр ч барахгүй бичлэг алдагдсан нь үүнийг санамсаргүй үйлдэл биш хэмээцгээж байна. Улс төрийн хүрээнд Н.Энхбаярыг “намнах” гэсэн хүмүүс нэг биш нэлээд бий. Тиймдээ ч хэн нэгэн тэдгээр хүмүүсийн гар хөл болсон байх магадлалтай. Нөгөө талаар тухайн бичлэгийг үзсэн хүн бүр нүүр номынхоо найз нартай сэтгэгдлээ хуваалцаж, тэрхүү нийгмийн сүлжээнд цацагдсэн бичлэгийн талаар өөр өөрсдийн байр суурийг илэрхийлж байна. Ингэхдээ “Ийм бичлэг хийчихээд л хадгалаад байж байдаг. Тэгсэнээ алдчихлаа гээд л. Ер нь жүжгийн сценари гэдэг ч үнэн байх шүү” хэмээн олонх нь тухайн бичлэгийн “Баатар”-уудыг жигшин зэвүүцсэн өнгө аястай бичжээ. Сонгуулийн шоу ид эхэлж, улс төрчид яах ийхээ “сэтгэж” байгаа энэ үед “Монгол тулгатны 100 эрхэм”-ийг ийнхүү ашигласан байх ч талтай. Ямартай ч өнөөдөр “Hero entertainment”-ынхан энэ талаар хэвлэлийн бага хурлаараа мэдээлэх бололтой. Мөн нэг эх сурвалжууд тус студийнхан С.Зоригийн хэрэгт холбогдох баримтат кино хийж байсан бөгөөд энэ киноныхоо бүх л баримтыг дээрх бичлэгтэй хамт алдсан гэсэн мэдээллийг өгч байна.