Дэлхийн хэвлэл мэдээллийн сувгуудаар өчигдөр орой төрсөн эхээ урвасанд тооцож өөрийн гараар цаазалсан Исламын улс бүлэглэлийн гишүүн залуугийн тухай нийтлэж, олон нийтийг цочирдууллаа. Уг залуу нь 21 настай Али Сакр гэгч байсан ба эхийгээ олны өмнө буудаж хороосон байна. Түүний ээжийг Лина аль-Касем гэдэг байсан ба Ракка хотын шууданд ажилладаг байжээ. Тэрбээр АНУ тэргүүтэй холбоотнууд удахгүй Исламын улс бүлэглэлийг устгах тул хамт оргохыг хүүдээ ятгаж байсныг хүү нь өөрийн бүлгийнхэндээ дуулгаснаар цаазлах болсон гэнэ. Сирийн Ракка хот дахь эх сурвалж түүний зургийг Твиттер хуудсанд нийтэлжээ. Энэ бол Исламын улс бүлэглэлийн үйлдсэн олон харгис аллагын нэг юм. Тэдний үзэл сурталд гэр бүлийнхнийгээ бурхны ариун үйл хэргийн төлөө алахыг зөвшөөрдөг гэнэ. Тухайлбал зөнч Мухаммедын итгэлт шавь Абу Обейда ийм шалтгаанаар төрсөн эцгээ хөнөөж байсан түүхийг тэд өөрийн хүмүүстээ байнга ухуулж сурталчилдаг байна.
