Төв аймгийн Батсүмбэр, Эрдэнэ сум, Булган аймгийн Гурванбулаг, Сэлэнгэ сум болон Сэлэнгэ аймгийн Ерөө, Мандал, Хүдэр сумдад гарсан гал түймрийг унтраахад зориулж иргэд, ААН-үүд, ТББ-ууд сайн дураараа нэгдэн, гал сөнөөгчдөд тусламж илгээсээр байна.
Энэхүү хандивын аяны давлагааг үргэлжлүүлж “Хөдөө аж ахуйн бирж” ХХК-ийн хамт олон нэг өдрийн цалингаа Онцгой байдлын ерөнхий газарт хандивлалаа. Тус биржид 40 орчим ажилчин ажилладаг бөгөөд тэд түймэртэй тэмцэж байгаа гал сөнөөгчдөд туслах үүднээс ийнхүү өөрсдийн нэг өдрийн цалингаа илгээжээ. Тэд цалингаа хандивлахын сацуу гал түймэртэй тэмцэж байгаа гал сөнөөгч болон нутгийн иргэдэд эх ороноо хамгаалан тэмцэж байгаад талархал дэвшүүлсэн байна.
2017.07.17-ны өдрийн 12.00 цагийн байдлаар Онцгой байдлын ерөнхий газрын хандивын дансанд 84 иргэний 32.471.835 төгрөг, 34 төрийн болон төрийн бус байгууллага, аж ахуйн нэгжийн 197.367.971 төгрөг, нийт 229.839.806 төгрөгийн мөнгөн хандив ирүүлсэн байна. Мөн одоо асч байгаа түймрийн голмтуудад нийт онцгой байдлын газар болон зэвсэгт хүчний анги нэгтгэлүүдээс нийт 1346 хүн 109 техник хэрэгсэлтэйгээр ажиллаж байгаа юм.
