Ерөнхийлөгчийн ээлжит сонгуулийн талаар СЕХ-ноос өчигдөр гурван тогтоол гаргажээ.
Нэгдүгээрт: Сонгогчдын нэрийн жагсаалтад 1.988.868 сонгогч бүртгэгдсэнээс 1.357.788 сонгогч буюу 68.27 хувь нь санал хураалтад оролцсон дүн гарлаа. Өмнөх мэдээллээр 1.978.268 сонгогч бүртгэгдсэн гэж мэдээлж байсан. Үүн дээр гадаадад оршин суугаа сонгогчдын бүртгэл буюу 7209 сонгогч нэмэгдэн орж ирж байна. Түр тэмдэглээтэй 44.000 сонгогчдоос 3388 сонгогч өөрийн хэсэг дээрээ саналаа өгчээ. Дүгнэж хэлэхэд, сонгуулийн ирц бүрдэж, нийт сонгогчдын 68.27 хувь нь саналаа өгсөн учир сонгуулийг хүчинтэй тооцсон шийдвэр гаргасан.
Хоёрдугаарт: Өнөөдөр өглөө 09.10 минутад сонгуулийн сүүлийн хэсгийн дүн ирсэн. Говь-Алтай аймгийн Цогт суманд асуудал гарсны улмаас дүн удаж ирсэн. Тодруулбал, тус суманд байдаг үүрэн телефоны мобиком, юнителийн сүлжээг зориудаар тасалсан учир 428 дугаар хэсэг дүн мэдээгээ явуулж чадаагүй. Урьд өмнө нь ийм хорлон сүйтгэх ажиллагаа болж байгаагүй гэдгийг дуулгая.Ингээд санал хураалтын дүнг СЕХ-гоор авч хэлэлцсэн. Үүнд МАН-аас нэр дэвшигч М.Энхболд 411.748 санал буюу 30.32 хувь, АН-аас нэр дэвшигч Х.Баттулга 517.478 санал буюу 38.11 хувь, МАХН-аас нэр дэвшигч С.Ганбаатар 409.899 санал буюу 30.19 хувийн санал тус тус авчээ. Монгол Улсын Үндсэн хууль, Сонгуулийн хуульд зааснаар нэр дэвшигчдын хэн ч олонхийн санал авч чадаагүй учир дахин санал хураах шийдвэр гаргалаа. 2017 оны Монгол Улсын Ерөнхийлөгчийн ээлжит сонгуулийн дахин санал хураалт долдугаар сарын 09-нд явагдахаар товлогдлоо. Үүнд хамгийн их санал авсан Х.Баттулга, М.Энхболд нэр дэвшигчид өрсөлдөнө. Харин гадаадад оршин суугаа монголчуудын саналыг ирэх сарын 04-ний өдөр авахаар тогтлоо.
Гуравдугаарт: Хоёр дахь шатны санал хураалтын саналын хуудасны загвар, тоо, нэгдсэн дугаарыг сая баталлаа. Өнөөдрөөс эхлэн хоёр дахь шатны санал хураалтын бэлтгэл ажилд орлоо. Хамгийн гол нь дахин санал хураалтаар 50 хувь дээр + 1 санал, 50 хувь + 1 сонгогч гэсэн зарчмаар явагдана. Хэрэв үүнд хүрэхгүй бол сонгуулийг бүхэлд нь хүчингүйд тооцож, УИХ дахин сонгууль зарлана.
Дахин санал хураалтын зардлын хувьд 7.2 тэрбум төгрөгийг төсөвлөсөн бөгөөд уг төсвийг Засгийн газраас гаргуулахаар шийдвэрлэлээ.