Өсвөр насныхныг амиа хорлоход өдөөн турхирдаг “Цэнхэр халим” гэх тоглоомын талаарх мэдээлэл цахим сүлжээнд нэлээд хурдтай тархсан. Тус тоглоом нь өсвөр насны хүүхдүүдийн сэтгэл санааны эмзэг байдлыг ашиглаж амиа хорлоход өдөөн турхирдаг талаарх мэдээллийг өмнө нь хүргэж байсан билээ.ОХУ-аас гаралтай энэ тоглоомын улмаас 2015 оны арваннэгдүгээр сараас 2016 оны дөрөвдүгээр сарын хооронд 130 өсвөр насны хүүхэд амиа хорлосон тоон мэдээлэл байгаа. Хүүхдүүдийг амиа хорлоход хүргэсэн найман бүлгэм ажиллуулж байсан 21 настай залууг тус улсын хуулийнхан баривчилж шийтгэсэн.
Тэгвэл манай улсад “Цэнхэр халим” сүлжээ тоглоом аль хэдийн ороод ирсэн талаар мэдээлэл энэ сарын эхээр гарсан. Цагдаагийн байгууллагын мэдээлсэнээр энэ тоглоомоор тоглож, бие махбодьдоо гэмтэл учруулсан байж болзошгүй хэд хэдэн тохиолдлыг илрүүлэн шалгалтын ажиллагааг эхлүүлээд байгаа. Түүн дотор “Цэнхэр халим” тоглосон сурагч амиа хорлосон байх магадлалтай талаар мэдээлэл гарлаа. Тодруулбал, энэ сарын эхээр нэгэн дунд сургуулийн сурагч амиа хорлосон хэрэг гарчээ. Тус хүүхэд гэрийнхээ угаалгын өрөөнөөс судсаа ханасан байдалтай олдсон байна.
Тус “Цэнхэр халим” гэх тоглоомын талаар Эрүүгийн цагдаагийн албаны тасгийн дарга, цагдаагийн Хошууч С.Ариунболор "Цэнхэр халим нэртэй сошиал тоглоом бий болж манай улсаас хийх хандалт нэмэгдэж байгаатай холбоотой шалгалтын ажил хийж байна. Шалгалтын явцад монгол хэл дээр “Цэнхэр халим” нэртэй фэйсбүүк групп хэд хэд нээж, дагагчдын тоо тодорхой хэмжээнд хүрсэнийг цагдаагийн байгууллагаас таслан зогсоож, дээрх группуудыг хаасан байгаа. Дээрх группт нэгдэж орсон дунд сургуулийн болон их дээд сургуулийн оюутан сурагчид даалгавар авч, эхний даалгаваруудыг биелүүлж бие махбодьдоо гэмтэл учруулсан байж болзошгүй байгаа нь тогтоогдсон. Одоогийн байдлаар шалгалтын ажиллагааг үргэлжлүүлж байна” гэлээ. Харин тус тоглоомоор тоглосон хүүхдүүдийн тухайд “Анх фэйсбүүкээс олж мэдээд элсэн орсон. Өдрөөс өдөрт группт нэгдэгчдийн тоо нэмэгдэж байсан. Ингээд эхнээсээ далгавраа авч, өөртөө болон бусдад хохирол учруулсан. Ийм тоглоомоор тоглох дэмий байдаг юм байна” хэмээн ярьсан байна.
Ийм учраас эцэг эхчүүд та бүхэн үр хүүхэдүүддээ анхаарал хандуулахыг хүсэж байна.
