Монголын үндэсний сагсан бөмбөгийн холбооны үндэсний супер лигийн 2015-2016 оны шинэ улирлын тоглолт энэ сарын 21-ний бямба гаригт эхлэхээр тов гараад байсан ч 28-нд болж хойшлогджээ. Супер лигийн легионер тоглогчдын сонголт, монгол тоглогчидтой байгуулах гэрээ хэлцэл цэгцэрч дуусаагүй байгаа учраас түр хугацаагаар хойшлуулах хүсэлтийг багийн удирдлагууд тавьжээ. Үндэсний супер лигийн тоглолтод өнгөрсөн улиралд түүхэнд байгаагүй хамгийн олон баг буюу 11 баг өрсөлдсөн. Харин энэ удаа найман баг оролцохоор мэдүүлгээ ирүүлсэн байна.
