Төр нийгмийн нэрт зүтгэлтэн С.Зоригийн амь насыг онц хэрцгийгээр хөнөөсөн хэрэг одоогоос 18 жилийн өмнө гарсан билээ. 18 жил хүлээгдсэн тус хэргийн шүүх хурал хорих 461 дүгээр ангид эхлээд байна. Шүүх хурал хаалттай горимд шилжсэн талаар бид мэдээллэсэн. Шүүх хуралдааныг Баянзүрх, Чингэлтэй, Сүхбаатар дүүргийн эрүүгийн хэргийн анхан шатны шүүхийн Ерөнхий шүүгч М.Алдар, шүүгч Б.Мөнх-Эрдэнэ, С.Оюунчимэг нар дэнсэлж байна. Мөн улсын яллагчаар Б.Батжаргал, Ж.Сандагсүрэн нарын прокурорууд оролцоно. Тус хэрэгт Ц.Амгаланбаатар, Б.Содномдаржаа, Т.Чимгээ гэсэн гурван хүнийг шүүж байна. Эдгээр сэжигтэнүүд бүгд хөдөөний иргэд юм. Тиймээс уг иргэдийг хэлмэгдүүлж байгаа юм биш биз дээ гэх хардлага олон нийтийн дунд байгаа юм. Ингээд дээрх сэжигтнүүдийн хэн болох мөн тэд С.Зоригийг амиа алдсан 1998 оны 10 дугаар сарын 02-ны өдөр юу хийж, хаана байсан талаар мэдээлэл хүргэе.
Сэжигтэн Б.Содномдаржаа нь Булган аймгийн уугуул хүн. Түүний гэр бүл сүү, ногооны фермерийн аж ахуй эрхэлж амьдардаг. Түүнийг 2015 оны наймдугаар сарын 31-ний өдөр хашаандаа явж байхад нь хар машинтай, хар хувцастай, маск зүүсэн залуучууд авч явсан гэдэг. Б.Содномдаржаа нь жирийн нэг малчин. Түүний ар гэрийнхэн энэ хугацаанд хуулийн байгууллагад 51 удаа өргөдөл бичиж, Ерөнхийлөгч Ц.Элбэгдоржид хүртэл захидал бичсэн ч хариу ирээгүй байна. С.Зориг агсан амиа алдсан дуулиант өдөр Б.Содномдаржаа аавтайгаа орон байраа засах, тариа ногоогоо хураах ажилаа хийж байсан талаар ээж нь ярилцлага өгсөн билээ.
Сэжигтэн Т.Чимгээ Эрдэнэт хотод амьдардаг. Т.Чимгээг Эрдэнэт хотод ажилдаа явах гээд автобусны буудал дээр байхад нь хар машинтай хүмүүс бариад явсан байдаг. Т.Чимгээ гурван хүүхдийн хамт амьдардаг жирийн нэг эмэгтэй. Түүний ар гэрийнхэн хэлэхдээ н.Амгаланбаатар гэх залуугийн гүтгэлгээр бариад явсан гэсэн мэдээлэл хийсэн. Түүний хувьд нийтийн хоолны тогооч мэргэжилтэй. Энэ хэрэг гарах үед буюу 1998 онд Т.Чимгээ 22 настай байсан бөгөөд ГОК-ын гуанзанд тогооч хийдэг байсан. Түүний ах Т.Хүдэрбат энэ хэргийн талаар хэлэхдээ "Амгаланбаатар гэх хүнийг манай дүү Чимгээгийн нөхрийн талын өвгөн, хөгшин хоёр өргөж авсан байдаг. Ингээд хүн амины хэргээр 20 гаруй жилийн ял авч, шоронд орсныхоо дараагаас манай дүү Чимгээ рүү мессеж бичдэг болсон юм билээ. Дарамталсан мессежүүд их ирүүлдэг. Уг нь тэрийг тоодоггүй байсан. Гэтэл өнгөрсөн жил дүүг маань тагнуулынхан баривчилж, авч явсан. 2015 оны наймдугаар сард Эрдэнэтэд ажилтай явж байхад нь баривчилсан. Гурав хоногийн хугацаанд таг чиг байсны эцэст тагнуулынхан авч явсан гэсэн мэдээлэл ирсэн. Бидний мэдэж буйгаар дүүг маань тэр Амгаланбаатар гэж хүний гүтгэлгээр энэ хэрэгт хүчээр холбогдуулж байгаа бололтой. Манай дүүгийн хувьд тухайн үед бага насны гурван хүүхэдтэй байсан. Гэтэл тийм хүн тийм хэрэг хийгээд явж байх уу?" гэж мэдээлж байв.
Сэжигтэн Ц.Амгаланбаатар Орхон аймгийн харьяат, 35 настай. Түүний хувьд одоо хүн амины хэргээр шоронд ялаа эдэлж буй этгээд юм. Тэрбээр шоронд байх хугацаандаа өөрийгөө "С.Зоригийг алсан" хэмээн мэдэгдэж, "Надтай хамт Б.Содномдаржаа, Т.Чимгээ нар энэ хэргийг үйлдсэн" хэмээн мэдэгдсэн. Ц.Амгаланбаатар нь айлын өргөмөл хүүхэд. Хэрэг гарах үед 17 настай байсан.