“Боловсрол” телевизийн уран бүтээлчид “Яг түүн шиг 2018” шоу нэвтрүүлгийг Нидерланд Улсын “Эндемон Шайн” группийн албан ёсны эрхтэйгээр гурав дахь жилдээ бэлтгэн хүргэж байгаа билээ. Энэ жилийн шоуны эхний дугаар өчигдөр үзэгчдийн хүртээл болов. Эхний дугаарт "Эмоци" продакшны жүжигчин О.Тэмүүжин буюу Тэмка Харанга хамтлагийн дуучин Х.Лхагвасүрэнгийн "Үзэсгэлэнт минь" дууг "Яг түүн шиг" дуулж олныг баясгасан юм. Түүний дуулахыг сонссон Харангын Лхагваа өөрийн цахим хуудаснаа "Тэмкаг ингэнэ гэж мэдсэн бол хувцаснаасаа өгдөг байж" гэжээ.
“Яг түүн шиг 2018” шоуны энэ жилийн дугаарт загвар өмсөгч Ж.Энэрэл, ая зохиогч, дуучин Б.Нацагдорж, “Sweetymotion” хамтлагийн дуучин Г.Сүндэрмаа, театр, киноны жүжигчин М.Цэрэндолгор, “A sound” хамтлагийн дуучин Ц.Тэмүүлэн, “Эмоци” продакшны жүжигчин О.Тэмүүжин, дуучин, жүжигчин Ч.Очгэрэл, “VR” хамтлагийн гишүүн, загвар өмсөгч О.Билгүүн нар оролцож байна. Эхний дугаарын ялагчаар ая зохиогч, дуучин Б.Нацагдорж буюу Наки түрүүлсэн юм.
