ОХУ-ын нэрт дасгалжуулагч Дмитрий Миндиашвилигийн нэрэмжит ОУТ энэ сарын 19-22-нд Красноярск хотод болно. Үүнээс долоо хоногийн дараа болох Иван Ярыгиний нэрэмжит “Алтан Гранпри”-гийн өмнөх том сорилт Миндиашвилигийн уламжлалт тэмцээнээр болох нь. ДБНХ-ноос чансаа олгох тэмцээнүүдэд зохион байгуулагч орноос таван бөх барилдуулахаар шийдвэрлэсэн юм. ОХУ-ын эрэгтэйчүүдийн шигшээ багийн ахлах дасгалжуулагч Жамболат Тедеев эрэгтэйчүүдийн 10 жинд тус бүр хоёроос гурван тамирчинг “Алтан Гранпри”-д барилдуулахаар албан ёсоор зарлаад байна. Тэгвэл үлдсэн тамирчдыг дээрх тэмцээнээс сонгож авах юм. Миндиашвилигийн тэмцээнд 2015 оны дэлхийн аварга Магомедрасул Газимагомедов болон Артём Гебеков, Муршид Муталимов, Мурадин Кушхов, Гажи Набиев шилдгүүдтэй 23 дагестан эр, ДАШТ-ий хүрэл медальт Сослан Кцоев, ЕАШТ-ий медальт Заур Макиев, Оросын аварга Заурбек Сидаков болон Давид Баев, Ацамаз Санакоев тэргүүтэй Хойд Осетийн 14, Алдар Бальжинимаев, Балдан Цыжипов, Алексей Боровицкий, Арсалан Будажапов тэргүүтэй манайхны эчнээ танил 34 буриад бөхчүүд оролцохоор болжээ.
