Сүүлийн үед эмнэлгүүдийн хүүхдийн тасаг ачааллаа дийлэхгүй болжээ. Ханиадтай хүүхдүүд дүүргийн эмнэлгүүдийн коридорт хэвтэн эмчлүүлж байгаа бол хувийн хүүхдийн эмнэлгүүд хүртэл ачааллаа дийлэхгүй болсон байна. Хэтэрхий олон хүүхэд эмчлүүлж байгаагаас болоод хүүхдүүдийн ханиад бүрэн эдгэхгүй байгаа ажээ. Нэг дүүрэгт гурван эмч зэрэг үзлэг хийж байгаа хэдий ч иргэд доод тал нь нэг цаг дугаарлан байж хүүхдээ үзүүлж байна. Мөн эцэг, эхчүүд хүүхдийнхээ ханиадны эм, эмнэлгийн зардлыг дийлэхгүй байдалд хүрсэн байна. Учир нь ханиадны улиралтай зэрэгцүүлэн эмийн сангууд эмний үнээ нэмсээр байгаа нь иргэдэд хүндрэлтэй байгаа аж. Ханиад томууны гол шалтгаан хүйтний улирал бөгөөд агаарын бохирдлоос ч үүдэлтэй аж. Хортой утаа нь ханиадтай хүүхдүүдийн уушгины цоргыг нарийсгах, амьсгалын замд ачаалал өгөх, хоолой хорсох, өвчлөлийн эдгэрэлтийг удаашруулах гол шалтгаан болдог байна. Түүнчлэн шинээр төрж буй нярай, бага насны хүүхэд төрөлхийн болон олдмол харшилтай байх нь элбэг болжээ. Ийм харшилтай хүүхдүүд ханиад хүрэхдээ маш хурдан төдийгүй уушгины хатгалгаа болон хүндрэх нь их байдаг аж.
Ханиад томуунаас урьдчилан сэргийлэх хамгийн үр дүнтэй арга нь вакцин ажээ. Манайд улсын болон хувийн эмнэлгүүд томуугийн вакцин хийж байна. Эрдэмтэд жил бүр томуугийн хэлбэрийг сайтар судлаж тогтоосны дараа тэр жилдээ дэгдэж болох хамгийн өндөр магадлалтай вирусийн эсрэг, вакциныг бүтээдэг. Хэрэв вирусийн хэлбэр нь үнэн зөв тогтоогдсон бол тэр жилдээ энэ вакцин нь хүмүүсийг ханиад томуутай холбоотой өвчнөөс хамгаалж чаддаг байна. Вирус нь хэдийгээр яг онож тогтоогдоогүй ч байсан энэ вакцин тодорхой хэмжээний хамгаалалт үзүүлдэг ажээ.
