МУГТ Г.Мандахнаран болон Чөлөөт бөхийн холбооны дасгалжуулагч Ц.Цогтбаяр, Б.Баяраа нар дөнгөж сая хэвлэлийн бага хурал хийлээ. Тэд хурлын эхэнд “Дасгалжуулагчид Г.Мандахнарангийн хүрэл медалийн төлөөх барилдааныг буруу шүүснээс болж хувцсаа тайлсан уу эсвэл дасгалжуулагчид хувцсаа тайлснаар буруу шүүсэн үү гэх асуудал олны дунд үүссэн. Гэхдээ эхлээд олон улсын спортын хороо алдаа гаргаж, Г.Мандахнарангийн барилдааныг буруу шүүсэн бол тэдэнд хариуцлага тооцох хэрэгтэй. Олон улсын арбитрын шүүх хэнийх нь бурууг тогтоогоод шүүгчийн зөв гэвэл дасгалжуулагчид бурууджээ гэж бодоод олон нийтэд залруулна” гэсэн юм . Улмаар шударга бус зүйлтэй тэмцсэний төлөө дасгалжуулагчдийг буруутгаж байгаа бол туйлын буруу. Монголын чөлөөт бөхийн холбооны Ёс зүйн хорооноос дасгалжуулагч Б.Баяраа, Ц.Цогтбаяр нарыг дасгалжуулагчынх нь ажлыг 2 хүртэлх жилээр хасах шийдвэр гаргасыг арай хатуудаж байна гэж үзэж байна. Хэрвээ шүүгчид буруу шүүгээгүй бол дасгалжуулагчид дэвжээн дээр гарахгүй байсан гэдгийг онцоллоо.
Энэ үеэр дасгалжуулагч Б.Баяраа “Узбекийн бөхийн барилдааны дараа Дэлхийн чөлөөт бөхийн барилдааны ерөнхийлөгч албан ёсны мэдэгдэл хийсэн. Тэрээр чөлөөт бөхийн хөгжил сайжирч байгаа ч булхайтай шүүлт явагдаж байна. Бид үүний эсрэг тэмцэх болно гэж мэдэгдсэн. Тэгэхээр дэлхийн бүх улс буруу шүүлтийн эсрэг тэмцэхээр болсон гэж ойлгож байгаа. Олон жилийн хөдөлмөр бүтээлийг хормын дотор үгүйсгэж, хүний эрхийг хязгаарлаж байгаад маш их харамсч байна. Хэрэв бид уучлалт гуйвал булхайтай шүүлт, бузар явдлын өмнө сөхөрч байгаатай адил байгаа юм” гэлээ.
